Японияда премьер-министрдин партиясы парламенттик шайлоодо жеңишке жетти

Японияда мөөнөтүнөн мурда өткөн парламенттик шайлоодо премьер-министр Санаэ Такаити жетектеген Либерал-демократиялык партия жеңишке жетти. Бул тууралуу 8-февралда Япониянын NHK телеканалы билдирди.

Маалыматка ылайык, Либерал-демократиялык партия шайлоодо 465 мандаттын 316сын алды. Бул жыйынтык партия үчүн 1955-жылдан берки эң мыкты көрсөткүч болуп саналат. Шайлоонун расмий жыйынтыктары чыга электе эле АКШнын президенти Дональд Трамп Санаэ Такаитини куттуктап, анын командасына ийгилик каалады.

Белгилей кетсек, 64 жаштагы Санаэ Такаити 2025-жылдын күз айларында парламенттеги добуш берүүнүн жыйынтыгында премьер-министр болгон. Ал жалпы элдик шайлоо аркылуу эмес, мурдагы өкмөт башчы Сигэру Исибанын кызматтан мөөнөтүнөн мурда кетишинен кийин дайындалган. Такаити элдик мандат алуу максатында мөөнөтүнөн мурда шайлоо өткөрүүнү чечкен. Ал өзүнүн башкаруу программасында коргонуу саясатын күчөтүүнү, мамлекеттик чыгымдарды жана инвестицияларды көбөйтүүнү, экономикалык өсүштү стимулдаштырууну, салыктык кирешелерди арттырууну жана бюджеттин туруктуулугун камсыздоону убада кылган.