Иранда Нобель сыйлыгынын лауреаты Наргес Мохаммади 7,5 жылга эркинен ажыратылды

Иранда Нобель тынчтык сыйлыгынын лауреаты, 53 жаштагы укук коргоочу Наргес Мохаммади 7,5 жылга эркинен ажыратылды. Бул тууралуу анын тарапкерлери билдиргенин чет элдик басылмалар жазышууда.

Маалыматка ылайык, сот Мохаммадини мамлекеттик коопсуздукка коркунуч жараткан аракеттери үчүн 6 жылга, пропаганда жүргүзүү үчүн 1,5 жылга кескен. Мындан тышкары, ага эки жыл өлкөдөн чыгууга тыюу салынып, дагы эки жылга Ирандын түштүк-чыгышындагы Хосф шаарына сүргүн жазасы берилди.

Адвокат Мустафа Нилинин айтымында, өкүм ишемби күнү Мешхед шаарында чыгарылган. Иран бийлиги бул чечимге азырынча расмий комментарий бере элек.

Белгилей кетсек, 2024-жылдын декабрында Наргес Мохаммади ден соолугуна байланыштуу абактан убактылуу бошотулган. Ал эми 2025-жылдын декабрында кайрадан кармалганы маалым болгон.