Таласта стратегиялык объекттер мамлекетке кайтарылды

Таластагы "В" категориясындагы стратегиялык объекттер мамлекеттин менчигине кайтарылды. Бул тууралуу 9-февралда УКМКнын басма сөз кызматы билдирди.

Маалыматка ылайык, 2003-жылы “Тобой” коомдук бирикмесинин жетекчиси С.T. Кадастр мамлекеттик мекемесинин Талас филиалынын жана “Талас суу чарбасы башкы башкармалыгы” мамлекеттик мекемесинин кызмат адамдары менен алдын ала сүйлөшүп, калктын жашоо-тиричилигин камсыз кылуучу объекттерди мыйзамсыз менчиктештирип алгандыгы аныкталган.

Тактап айтканда, 2003-жылы “Тобой” коомдук бирикмесинин жетекчиси С.Т. мамлекеттик органдардын кызматкерлеринин кызматтык абалын пайдаланып, кызматтык жасалмалоо жолу менен “В” категориясындагы стратегиялык объекттерди (суу алуучу жайларды) аталган коомдук бирикменин балансына мыйзамсыз өткөрүп берген, кийинчерээк ал 36 миллион 415 миң 400 сомдук, учурда инфраструктурасы бар 1,7 гектар, 0,68 гектар жана 1 гектар жер тилкелерин жеке менчикке өткөрүп берген.

Жүргүзүлгөн тергөө иш-чараларынын натыйжасында, аталган тиричиликке керектелүүчү объекттер мамлекеттин менчигине кайтарылган.