Ысык-Атада стратегиялык мааниге ээ болгон суу чарба объектиси мамлекетке алынды

Чүйдүн Ысык-Ата районундагы суткалык жөнгө салуу бассейни мамлекеттин балансына кайтарылды. Бул тууралуу Улуттук коопсуздук мамлекеттик комитети билдирди.

Маалымдалгандай, стратегиялык мааниге ээ болгон суу чарба объекти мыйзамсыз менчиктештирилип кеткен. Тактап айтканда, 1999-жылдын 30-ноябрында өткөрүп берүү актысынын негизинде аталган бассейн мыйзамсыз түрдө "Пахарь" айыл чарба өндүрүштүк кооперативинин балансына өткөрүлүп берилген.

Кийинчерээк, 2021-жылы Ысык-Ата районунун Ивановка айыл өкмөтүнүн башчысынын чечими менен суткалык жөнгө салуу бассейни "Пахарь" айыл чарба өндүрүштүк кооперативинин менчигине өткөн жана андан соң жеке менчик укугун тастыктаган мамлекеттик акт алынган.

Тергөөдөн кийин кайтарылган объект Айыл чарба министрлигинин түзүмдүк бөлүмү болгон Ысык-Ата суу чарба башкармалыгынын карамагына өткөрүлүп берилген.