Кышкы Олимпиада оюндарында медалдардын сапаты талкууда

Кышкы Олимпиада оюндарын уюштуруучулар чемпиондорго тапшырылган медалдардын сынып жатышынын себептерин иликтеп жатышат. Бул тууралуу BBC News кабарлады.

Маалыматка ылайык, Олимпиада оюндарын уюштуруу комитетинин жетекчилеринин бири Андреа Франчизи медалдардын сапатына өзгөчө көңүл буруларын билдирди. Анын айтымында, сыйлык тапшыруу учуру спортчулар үчүн эң маанилүү учурлардын бири болгондуктан, бардык нерсе идеалдуу болушу керек.

Ошондой эле АКШнын Олимпиадалык жана Паралимпиадалык комитетинин расмий өкүлү америкалык делегация бул маселе боюнча уюштуруучулардан чечим күтүп жатканын маалымдады. Сынган медалдардын ордуна спортчуларга жаңылары берилеби же жокпу азырынча белгисиз.

Белгилей кетсек, олимпиадалык медалдардын сапатына байланыштуу көйгөйлөр буга чейин да катталып келген.