Вашингтон менен Ереван жарандык ядролук тармакта макулдашты

АКШнын вице-президенти Жей Ди Вэнс бүгүн, 9-февралда Армениянын премьер-министри Никол Пашинян менен Вашингтон жана Еревандын жарандык ядролук тармактагы кызматташтыгын өнүктүрүү боюнча келишимге кол койду.

Чет элдик басылмалар жазгандай, Жей Ди Вэнс Арменияны АКШ кызматташууну жогору баалаган өлкө катары мүнөздөп, президент Дональд Трамп Пашинян менен жана армян эли менен жакшы мамиледе экенин белгиледи.

Анын айтымында, тараптар жарандык ядролук тармактагы кызматташуу боюнча сүйлөшүүлөрдүн аяктаганын тастыктаган, "123-келишим" деп аталган документке кол коюшту. Бул келишим америкалык жана армяндык компаниялардын биргелешкен программаларды ишке ашыруусуна шарт түзөт.

Вэнс баштапкы инвестициялардын көлөмү 5 миллиард долларды түзөрүн, ал эми кийинки этапта дагы 4 миллиард доллар салынары пландалып жатканын кошумчалады.