Ооганстанда баңгизаттарга каршы жазаны катаалдаштырган жаңы кылмыш кодекси күчүнө кирди  

Ооганстанда баңгизаттарды өндүрүү жана колдонуу үчүн жазаны катаалдаштырган жаңы кылмыш кодекси киргизилди. Бул тууралуу 9-февралда Khaama Press агенттиги расмий документке таянып кабарлады.

Маалыматка ылайык, баңгизат колдонгондор абалына жараша алты айга чейин эркинен ажыратылышы мүмкүн. Ал эми баңгизат саткандарга бир жылдан жети жылга чейин абак жазасы каралган. Ошондой эле апийим жана кара куурайды өстүрүү үчүн да жаза каралган.

Жаңы кодекске ылайык, алынган баңгизаттын көлөмүнө жараша жазанын деңгээли күчөтүлөт. Мындан тышкары бул категориядагы иштер боюнча даттануу укугу чектелип, көпчүлүк учурларда биринчи инстанциядагы соттун чечими акыркы болуп эсептелет.