Кыргызстан-Франция ортосунда түз аба каттамын ачуу маселеси каралууда

"Кыргызстан аэропорттору" мамлекеттик ишканасынын жетекчиси Манасбек Самидинов Франциянын Кыргызстандагы элчиси Николя Фай менен жолугушту. Бул тууралуу бүгүн, 10-февралда мекеменин басма сөз кызматы билдирди.

Маалым болгондой, жолугушуунун жүрүшүндө тараптар француз авиакомпаниялары тарабынан Франция менен Кыргызстандын ортосунда түз аба каттамын ачуу мүмкүнчүлүгүн карап чыгышты.

"Талкуу жарандык авиация жана туризм тармагындагы эки тараптуу кызматташтыкты өнүктүрүүнүн келечегине, транспорттук жеткиликтүүлүктү кеңейтүүгө, ошондой эле эки өлкөнүн ортосундагы ишкердик жана гуманитардык байланыштарды чыңдоого багытталды. "Кыргызстан аэропорттору" ишканасы эл аралык маршруттук тармакты кеңейтүүгө кызыкдар, бул багытты француз өнөктөштөрү менен биргеликте практикалык жактан иштеп чыгууга даяр экенин ырастады",- деп белгиленген маалыматта.