Эпштейндин адам сатуу менен алектенбегени тастыкталдыбы?

АКШнын Федералдык тергөө бюросу финансист Жеффри Эпштейн таасирдүү адамдарга кызмат кылган жашы жете электерди сексуалдык сатуу тобун иштетпегенин аныктады. Бул тууралуу Associated Press маалымат агенттиги жазды.

Агенттик тергөөчүлөр жашы жете элек кыздардын сексуалдык зомбулуктарга кабылышканын аныкташканы менен Эпштейндин сексуалдык сатуу тобун жетектегени жөнүндө жетиштүү далилдерди таба алышпаганын белгилейт.

Агенттик чалгындоо кызматы кылмыштуу ишмердүүлүктү көрсөтө турган эч кандай каржылык бүтүмдөрдү таппаганын, ал эми айрым жабырлануучулар өз билдирүүлөрүндө бул зомбулукту башкалар жасаганын көрсөтүшкөнүн жазат.

Аталган бюронун документтерине ылайык, көп учурларда чогултулган далилдер федералдык кылмыш ишин козгоо үчүн жетишсиз болгон. Ошондуктан материалдар жергиликтүү укук коргоо органдарына өткөрүлүп берилген. Бир нече жабырлануучулар Жеффри Эпштейн жана анын шериги Гислейн Максвелл аларды башкалар менен жыныстык катнашта болууга мажбурлабаганын айтышкан.