Өспүрүмдүн катышуусундагы жол кырсыгы эки адамдын өмүрүн алды

Нарындын Кочкор районунда ата-энесине айтпай унаа айдап чыккан өспүрүм кырсыкка учурап, жанындагы эки досу каза тапты. Маалыматты бүгүн, 10-февралда Нарын облустук Жол кыймылынын коопсуздугун камсыздоо башкармалыгы SUPER.KG порталына тастыктады.

Маалым болгондой, каргашалуу окуя 7-февралга караган түнү саат 03:00 чамасында болгон. Анда KIA K5 үлгүсүндөгү автоунааны үйдө ата-энеси жоктугунан пайдаланып, 2010-жылы туулган бала айдап чыккандыгы аныкталды. Ал 2009-жылы туулган 2 досун салып катуу ылдамдыкта баратып, рулга ээ боло албай ала салып кеткен.

Натыйжада айдоочу денесинен жаракат алып, ооруканага түштү. Ал эми эки жүргүнчү ооруканада каза болду. Тергөө иштери жүрүп жатат.