Рамзан Кадыров уулунун "кырсыкка кабылышы" жасалма акылдын алдамчылыгы экенин айтты 

Чеченстандын лидери Рамзан Кадыров республиканын прокурору Арсан Адаев менен болгон жолугушууда уулу Адам Кадыров жол кырсыгына кабылды делген маалыматтар ойдон чыгарылганын айтты. Бул тууралуу Орусия ЖМКлары жазышты.

"Жасалма интеллект менен кимди болсо да алдай аласыз. Өлкө боюнча 128 миң кырсык болду, 13 миң 9 адам каза болду, бирок эч ким эч нерсе дебейт. Бирок, кайдан-жайдан Кадыровдун уулунун кырсыгы жөнүндөгү ойдон чыгарылган окуя дүйнөлүк жаңылыктарда биринчи орунга чыкты",- деген ал.

Эске салсак, 16-январда Чеченстандын лидеринин уулу жол кырсыгына кабылганы кабарланган. 18 жаштагы Адам Кадыров Орусиянын Өзгөчө кырдаалдар министрлигинин Ан-148-100-EM учагы менен Чеченстандан Москвага жеткирилгени да айтылган.

Чечен бийлиги муну жалган маалымат деп келет.

18 жаштагы Адам Кадыров Чеченстандын коопсуздук кеңешинин катчысы. 2025-жылдын апрель айында ал Чеченстандын Ички иштер министрлигинин куратору болуп дайындалган.