150 пайыз үстөк... Манаста үйүндө жашыруун күрөөкана иштеткен аял кармалды (видео)

Жалал-Абад облусунун Манас шаарында үйүндө жашыруун күрөөкана уюштурган аял кармалды. Бул тууралуу 10-февралда УКМКдан билдиришти.

Маалыматка ылайык, Ш.К. аттуу жаран А.Э.дан 1 миллион сом карыз алып, ай сайын 150 миң сом пайыз төлөп турган факты аныкталды. Карызды төлөө мезгилинде А.Э. бир нече жолу Ш.К.нун мүлкүн опузалаган. Кечиктирилген пайыздарды төлөп берүүнү талап кылып, унаасын тартып алган. Натыйжада 4-февралда А.Э. 200 миң сом өлчөмүндөгү пайыз алып жатканда кармалды.

Тактап айтканда, А.Э. үйүндө жашыруун күрөөкана иштетип, жылына 150 пайыздан ашык үстөк менен кыймылдуу жана кыймылсыз мүлк, ошондой эле баалуу металлдардан жасалган зер буюмдар менен күрөөгө коюлган акчалай насыяларды берип турган.

Мындан тышкары, шектүүнүн жашаган жерин тинтүү учурунда кыймылсыз мүлктүн техникалык паспорттору, өздүгүн тастыктаган күбөлүктөр, жер тилкелерине жеке менчик укугун тастыктаган мамлекеттик документтер, күрөөгө коюлган зер буюмдар табылды.

Тергөө амалдарынын жүрүшүндө шектүү күнөөсүн мойнуна алып, көрсөтмө берген. Учурда тергөө иштери улантылууда.