WhatsApp веб-нускасында үн жана видеочалуу мүмкүнчүлүгүн ишке киргизүүдө

WhatsApp мессенжеринин колдонуучулары жакынкы убакта компьютердеги браузер аркылуу веб-нускадан туруп эле үн жана видеочалуу жасай алышат. Бул тууралуу 9To5Mac порталы жазды.

Маалыматка ылайык, WhatsApp Web платформасында үн жана видеочалууларды колдоо функциясы учурда тестирлөөдөн өтүп жатат. Азырынча бул мүмкүнчүлүк бардык колдонуучулар үчүн жеткиликтүү эмес жана бета-нускада гана иштеп жатат.

Алгачкы этапта колдонуучулар браузер аркылуу жеке чаттарда гана чалуу жасай алышат. Бул үчүн компьютерге өзүнчө тиркеме орнотуунун кереги жок — жөн гана чатка кирип, чалуу баскычын басуу жетиштүү болот.

Басылманын маалыматына караганда, бул функция дээрлик бир жылдан бери иштелип чыгып, WhatsApp аны компьютердик тиркемелердеги мүмкүнчүлүктөргө шайкеш келтирүү үчүн жакшырткан. Учурда негизги басым жеке чаттарга жасалууда.

Ал эми браузер аркылуу топтук үн жана видеочалууларды ишке киргизүү функциясы азырынча иштелип чыгуу стадиясында экени белгиленди.