Рамзан Кадыров кырсыктады делген уулунун видеосун жарыялады

Чеченстандын лидери Рамзан Кадыров уулу Адам Кадыров менен кечки тамак ичип жаткандагы видеосун жарыялады. Орусия басылмалары ал видеону Telegram каналында бөлүшкөнүн жазышты.

Анда видеону тартып жаткан Кадыровдун уулу кирип келип, учурашканда аны "тирилди" деп комментарийлегенин угууга болот.

Буга Кадыров уулунун жол кырсыгына кабылды делген маалыматтар ойдон чыгарылганын айтып, "Жасалма интеллект менен кимди болсо да алдай аласыз",- деп билдирүү калтырган.

Эске салсак, 16-январда Чеченстандын лидеринин уулу жол кырсыгына кабылганы кабарланган. Адам Кадыров Орусиянын Өзгөчө кырдаалдар министрлигинин Ан-148-100-EM учагы менен Чеченстандан Москвага жеткирилгени да айтылган.

Чечен бийлиги муну жалган маалымат деп келет.

18 жаштагы Адам Кадыров Чеченстандын коопсуздук кеңешинин катчысы. 2025-жылдын апрель айында ал Чеченстандын Ички иштер министрлигинин куратору болуп дайындалган.