Депутат Бишкекте көпүрөнүн курулушу 5 айдан бери бүпөй жатканын билдирди (видео)

Бүгүн, 11-февралда Жогорку Кеңештин жыйынында депутат Улукбек Карыпбек уулу Бишкектеги Жибек-Жолу проспекти менен Осмонкул көчөсүнүн кесилишиндеги курулушу жүрүп жаткан көпүрө боюнча тынчсыздануусун билдирди.

Анын айтымында, аталган курулуштун азабынан эл кыйналып, тыгын маселеси күчөдү.

"Бул (ред.: көпүрө) дээрлик 25-сентябрдан бери жабык. Бүгүнкү күнгө чейин курулуш аяктабай жатат. Элдин каттамы, унаа тыгыны чоң көйгөй жаратып жатат. Жоопкерчиликти алган подрядчы компания кайсы датага бүтүш керек? Аны көзөмөлдөгөн тийиштүү кызмат адамдары эмне иш кылып жатышат?",- деди депутат.

Эл өкүлү өкмөттүн өкүлүнөн тийиштүү маалыматтарды расмий түрдө алып берүү тапшырмасын берди.

Эскерте кетсек, аталган даректеги эски көпүрөнү кеңейтүү максатында реконструкция иштери жүрүп жатат.