Жүрөгүндө 5 стент... Оштун мэри Камчыбек Ташиевдин ден соолугу тууралуу маалымат берди (видео)

Ош шаарынын мэри Жеңишбек Токторбаев УКМКнын мурдагы төрагасы Камчыбек Ташиев менен байланышканын айтып, анын ден соолугу тууралуу маалымат берди.

Мэрдин айтымында, Ташиевдин ден соолугу жакшы, бирок жүрөгүндөгү беш стенттин бири жылып кеткен.

"Ден соолугу жакшы экен. "10-15 күнгө Германияга барып, стентти ордуна койдуруп келейин деп президенттен сурангам" деди. Бир аз таарынычын айтты го. "Өздүк курам менен коштошо албай калдым. Эң өкүнүчтүүсү ошол болду" деп. Эми эки достун өздөрүнүн мамилеси да. Мен ойлойм, өздүк курам менен сүйлөштүрсө керек. Эми ал жагын өздөрү билишет. Бизге караңгы. Бизге Ош шаарын оңдо дедиңер, иштеп жатабыз",- деди мэр.

Журналисттер Токторбаевден кызмат орду боюнча ар кандай кырдаалга даярдыгын сурашты. Калаа башчысы президенттин чечимине баш ийерин жана жумуштан четтетилсе кетүүгө даяр экенин билдирди.