Бороон болууда... Ашууларда учурдагы абал айтылды

Бүгүн, 11-февраль саат 17:00гө карата өлкөдөгү негизги ашууларда бороон болуп, жол тазалоо иштери тынымсыз жүргүзүлүүдө. Мындай маалыматты Транспорт министрлиги таратты.

Билдирүүгө караганда, буга чейин Бишкек - Ош жолунда оор жүк ташуучу унааларга киргизилген убактылуу чектөө алына элек. Каттам бар.

Төө-Ашууда жол тазалоо, кум-туз себүү иштери жүргүзүлүп жатат. Жети дубандагы жол тейлөө ишканалары өздөрүнө бөлүнгөн аймактарды толук көзөмөлдөп, атайын кезметке туруу менен жаралган кырдаалга ыкчам аракет көрүп жатышат.

Министрлик айдоочуларды унаа дөңгөлөктөрүн кышкыга алмаштырып, керектүү шаймандарды ала жүрүүгө чакырат. Ошондой эле, зарылчылык болбосо узак жолго чыкпай турууну эскертет.