Бишкек мэриясына жаңы автобустар жана атайын техникалар тапшырылды

Бүгүн, 12-февралда министрлер кабинетинин төрагасы Адылбек Касымалиев Бишкек мэриясына 95 жаңы автобустун жана 42 даана атайын техниканын ачкычтарын тапшыруу аземине катышты.

Иш-чара №1 кампанын аймагында өткөнүн өкмөттүн маалымат кызматы кабарлады. Анда Адылбек Касымалиев муниципалдык ишканаларды техникалык жактан чыңдоо боюнча иштер улантыларын белгилеген. Ал шаардык кызматтардын кызматкерлерин жаңы техниканы жоопкерчилик менен пайдаланууга, ошондой эле калкка көрсөтүлүүчү кызматтардын сапатын жогорулатууга чакыран.

"Ар бир транспорт каражаты жана техниканын ар бир бирдиги – шаар тургундарына кызмат кылган маанилүү ресурс. Сактык менен жана туура пайдалануу, элдин ишенимин актоо – ар бириңиздердин түздөн-түз милдетиңиздер",- деген айткан ал жаңы автобустар жана атайын техника шаардын өнүгүшүнө кошумча түрткү берерин, муниципалдык кызматтардын мүмкүнчүлүктөрүн кеңейтип, алардын ишин жеңилдете турганын кошумчалаган.