Нурсултан Назарбаевдин жубайы ооруканадан чыгарылды

Казакстандын биринчи президенти Нурсултан Назарбаевдин басма сөз катчысы Айдос Укибай экс-президенттин жубайы Сара Назарбаеванын январь айында ооруканадан чыгарылганын билдирди.

Анын айтымында, Назарбаева былтыр апрель айынан бери Алматыдагы президенттин мүлкүн башкаруу департаментинин медициналык борборунун Улуттук ооруканасында дарыланып келген.

"Ошол мезгилде ал катуу инфаркты башынан өткөргөн. Дарыгерлер коронардык артерия оорусун, узак мөөнөттүү жана оор диабеттен улам жүрөк жана өпкө жетишсиздигин, ошондой эле өнөкөт бөйрөк жетишсиздигин аныкташкан",- деп белгиледи Укибай.

Ал Сара Назарбаева көп убакыттан бери жасалма дем алдыруучу аппаратта жатканын, учурда Алматыдагы үйүндө медициналык кароодо экенин кошумчалады.

Эске салсак, 2025-жылдын май айында социалдык тармактарда Сара Назарбаеванын өлүмү тууралуу сөздөр тараган. Андан кийин Укибай бул маалыматтарды четке кагып, ооруканада экенин тактаган.