Жалал-Абадда курулуш графигин сактабаган подряддык уюмга эскертүү берилди

Жалал-Абад облусунда курулуш графигин сактабаган подряддык уюмга эскертүү берилди. Бул тууралуу 12-февралда Курулуш министрлигинен билдиришти.

Маалыматка ылайык, тиешелүү инспекторлор Токтогул районунун Абышов көчөсү 52 дарегиндеги 140 орундуу мектепке чейинки билим берүү мекемесинин курулуш иштери текшерген. Текшерүү учурунда жер кыртышын катмарлап таптап бекемдөө иштери аяктап, учурда тегиздөө процесстери жүрүп жаткандыгы аныкталды.

Бекитилген иш өндүрүшүнүн графигине ылайык, бетон иштери 2026-жылдын январь айында башталышы керек болчу. Бүгүнкү күнгө карата подряддык уюм тарабынан бетон куюу иштери башталган эмес, бул белгиленген мөөнөттөрдөн артта калууну шарттайт.

Натыйжада келишимдик милдеттенмелердин жана курулуш графигинин бузулушу боюнча тиешелүү актылар түзүлуп, подрядчыга графиктен артта калууну тез арада четтетүү жана жумуштун ыргагын жогорулатуу боюнча жазуу түрүндө эскертүү берилди.