Казакстандын ТИМ башчысы Кошербаев Кыргызстанга расмий сапар менен келет

Казакстандын тышкы иштер министри Ермек Кошербаев бүгүн, 12-февралда Кыргызстанга расмий сапар менен келет. Бул жөнүндө ТИМдин маалымат кызматы билдирди.

Сапардын алкагында тышкы иштер министри Жээнбек Кулубаев менен сүйлөшүүлөр, ошондой эле өлкө жетекчилиги менен жолугушуу пландалган.

Кыргызстандын ТИМ башчысы Кулубаев менен болгон жолугушууда тараптар саясий, соода-экономикалык, транспорт-логистикалык, суу-энергетикалык жана маданий-гуманитардык тармактардагы эки тараптуу кызматташтыктын учурдагы абалын жана келечегин талкуулашат.

Мындан тышкары, министрлер эки мамлекеттин башчылары тарабынан жетишилген макулдашуулардын аткарылышы, 2026-жылга карата жолугушуулар менен сапарлардын графигин, ошондой эле аймактык жана эл аралык уюмдардын алкагындагы өз ара аракеттенүүнү карап чыгышат.