Молдокматов саясий кырдаал Нурланбек Тургунбек уулунун айынан чыңалды дейт

Нурланбек Тургунбек уулунун Жогорку Кеңештин төрагалыгынан кетиши Камчыбек Ташиевдин УКМКнын төрагалыгынан алынуусуна жана президенттик шайлоону мөөнөтүнөн мурда өткөрүү боюнча көтөрүлгөн демилгеге негизделген.

Бул тууралуу саясатчы Жеңиш Молдокматов "Азаттыктын" "Эксперттер талдайт" берүүсүндө билдирди.

"Тургунбек уулунун буга чейинки кылгандары өзүнүн кызматтан кетүүсүнө түрткү болду. Саясий интриганы 75 адамдын кайрылуусунун алдында эле Нурланбек Тургунбек уулу баштаган. Нүзүп бийдин эстелигин ачууда "Камчыбек Кыдыршаевич биздин аталык" деп саясий интриганы ачыктап берген. Бул түздөн-түз президентти Шералыга теңегендик. Мына ошондон баштап анан күчөдү. Байсалов (ред.: министрлер кабинетинин төрагасынын орун басары) тирешти жанындагылар күчөттү деп ачыктады го",- деди ал.