Тажикстандын премьер-министри Кыргызстанга келди

Бүгүн, 13-февралда Тажикстандын өкмөт башчысы Кохир Расулзода жумушчу сапары менен Кыргызстанга келди. Аны “Манас” эл аралык аэропортунан вице-премьер Бакыт Төрөбаев тосуп алды. Бул тууралуу министрлер кабинетинин маалыматында айтылат.

Сапардын алкагында Тажикстандын премьер-министри Бишкек шаарында өтө турган Кыргыз-Тажик өкмөттөр аралык кеңешинин биринчи жыйынына катышат. Бул жыйын эки өлкөнүн ортосундагы кызматташтыкты өнүктүрүүгө багытталган маанилүү саясий-экономикалык аянтча болуп саналат.

Жолугушуунун жүрүшүндө соода-экономикалык байланыштарды кеңейтүү, суу ресурстарын натыйжалуу пайдалануу, транспорт жана логистика тармагындагы кызматташтыкты чыңдоо маселелери талкууланары күтүлүүдө. Кеңештин жыйынтыгында бир катар эки тараптуу документтерге кол коюлары пландалууда.

Мындан тышкары, эки өлкөнүн өкмөт башчылары борбор калаадагы айрым инфраструктуралык ишканаларга барып, алардын ишмердүүлүгү менен таанышмакчы. Бул кадам экономикалык кызматташтыкты тереңдетүүгө жана жаңы долбоорлорду ишке ашырууга өбөлгө түзөрү белгиленүүдө.