Чүйдө тоноочулукка шектелип үч жигит кармалды

Чүй облусунда тоноочулукка шектүү үч жаран кармалып, убактылуу кармоочу жайга киргизилди. Бул тууралуу облустук милиция 13-февралда маалымдады.

Ага ылайык, 10-февралда милицияга эки жаран арыз менен кайрылган. Алардын айтымында, 7-февралда Аламүдүн районунун Ленинское айылынын жанындагы талаада белгисиз адамдар аларга дене жаракаттарын келтирип, ачык түрдө мүлктөрүн тартып алышкан.

Тактап айтканда, алардын биринин iPhone 13 Pro Max үлгүсүндөгү уюлдук телефону жана акча каражаты салынган барсеткасы, экинчисинин кол сааты алынган.

Бул факт боюнча Кылмыш-жаза кодексинин 206-беренеси (Тоноо) боюнча кылмыш иши козголгон. Шектүү катары 2001-жылы туулган Т.К., 2002-жылы туулган К.О. жана 2006-жылы туулган К.Р. кармалышып, убактылуу кармоочу жайга киргизилди.

Тергөөдө тартып алынган мүлк үчүнчү жактарга сатылып жиберилгени аныкталды. Иш боюнча тиешелүү соттук экспертизалар дайындалып, тергөө иштери улантылууда.