Меркелдин Германиядагы президенттик шайлоого катышуу ниети жок экени айтылды

Германиянын мурдагы канцлери Ангела Меркелдин Германияда 2027-жылы өтүүчү президенттик шайлоого катышуу ниети жок. Бул тууралуу дүйнөлүк басылмалар Меркелдин басма сөз кызматына шилтеме берип жазышат.

Маалымат кызматы "бул тууралуу сөз болушу мүмкүн эмес" деп жооп берген.

Буга чейин "Bild" гезити Меркель көп жылдар бою жетектеген "Христиан-демократиялык союзу" партиясынын жетекчилиги "Жашылдар" партиясы аны президенттикке талапкер кылып көрсөтүшү мүмкүн деп чочулап жатканын жазган.

Ошол эле учурда "Жашылдар" партиясы да бул маалыматтын чындыкка дал келбестигин белгилеген.

Германияда президентти Федералдык жыйын шайлайт. Учурдагы президент Франк-Вальтер Штайнмайер 2017-жылдан бери бул кызматта.

Маалымат үчүн: Ангела Меркель 2005-жылы 22-ноябрда Германиянын канцлери болуп шайланган. Кийин 2009, 2013 жана 2018-жылдары кайрадан аталган кызматка шайланып, 16 жыл бою өкмөттү башкарып турган. Ал канцлердик кызматын 2021-жылдын 8-декабрында Олаф Шольцко өткөрүп берген.