Бектур Зулпиев президенттин жана өкмөттүн Жогорку Кеңештеги туруктуу өкүлү болуп дайындалды

Бектур Зулпиев президенттин жана министрлер кабинетинин Жогорку Кеңештеги туруктуу өкүлү болуп дайындалды. Бул тууралуу бүгүн, 13-февралда президенттин администраициясынан кабарлашты.

Буга чейин бул кызматты Алмасбек Абытов аркалап келген. Ал өз каалоосу менен кызматтан кеткен.

Зулпиевдин эмгек жолу

Жаңы дайындоого чейин Бектур Зулпиев мамлекет башчысынын кеңешчиси болуп иштеп келген. 2021-жылдын май айында ал президенттик администрациянын жетекчисинин орун басары болуп дайындалган. Андан мурда президенттин аппаратынын жетекчисинин орун басары кызматын аркалаган.

Мындан тышкары, Зулпиев мурда Курманбек Бакиевдин администрациясында иштеген. 2009-жылы президенттин аппаратынын юридикалык бөлүмүнүн башчысы болгон.

Ал 1998 жана 2003-жылдары Конституцияга өзгөртүүлөрдү киргизүү боюнча эксперттик топтун курамында иштеген. Ошондой эле 2021-жылдын 5-майында кабыл алынган Баш мыйзамдын акыркы текстинин авторлорунун бири экени айтылып келет.

Жаңы өкүл парламент менен аткаруу бийлигинин ортосундагы иш алып барууну жана мыйзам долбоорлорун макулдашуу процессин координациялайт.