Саясат таануучу: "Трамп Украина боюнча сүйлөшүүлөрдөн баш тартпайт"

АКШнын президенти Дональд Трамп Украинадагы жаңжалды жөнгө салуу боюнча сүйлөшүүлөрдөн баш тартпайт. Бул тууралуу Орусия басылмалары Инновациялык өнүгүү институтунун Геосаясий изилдөөлөр борборунун директору Дмитрий Родионовго шилтеме берүү менен жазышты.

Анын айтымында, Трамп үчүн ноябрда өтө турган Конгресске шайлоо эң башкы саясий максат болуп саналат. Родионов белгилегендей, бул процесс Республикалык партиянын рейтингин жогорулатуу үчүн маанилүү инструмент катары каралышы мүмкүн. Ошондой эле ал Трамп Украина маселесинен кандайдыр бир саясий же стратегиялык пайда табууга үмүттөнүшү мүмкүн экенин кошумчалады.

Саясат таануучунун пикиринде, эгер шайлоо алдында бул процесстен саясий пайда алуу мүмкүн эместиги айкын болсо, анда АКШнын Украина кризисин жөнгө салууга болгон активдүүлүгү солгундашы ыктымал. Ошол эле учурда Вашингтон расмий түрдө сүйлөшүүлөрдү токтотконун жарыялашы күмөн экенин айтты.

Мындан мурда Римдеги Эл аралык мамилелер институтунун директору Натали Точчи АКШ Европаны "сатты" деген пикирин билдирген.