"Ала-Тоо" депутаттык тобу Москва районунда көчмө жыйын өткөрдү

Бүгүн, 13-февралда "Ала-Тоо" депутаттык тобу Чүй облусунун Москва районунда көчмө жыйын өткөрдү. Бул тууралуу Жогорку Кеңештин басма сөз кызматынан маалымдашты.

Маалыматка ылайык, иш-чара депутат Гүлжан Сатиеванын демилгеси менен уюштурулуп, топтун жетекчиси Жанарбек Акаев жана бир катар депутаттар катышты.

Эл өкүлдөрү Беловодск айылындагы Маданият үйүнүн жана Москва райондук аймактык ооруканасынын абалы менен таанышып, Петровка айылындагы И.Черняховский атындагы орто мектепке барышты. 300 окуучуга ылайыкталып курулган мектепте учурда 1000ден ашык окуучу билим алып жаткандыктан, кошумча корпус куруу зарылдыгы белгиленди.

Көчмө жыйындын алкагында райондук мамлекеттик администрацияда жергиликтүү тургундар менен жолугушуу өттү. Анда ички жолдорду оңдоо, таза суу, социалдык объектилерди куруу, жумуш орундарын түзүү, медициналык кызматты жакшыртуу жана мыйзамдардын аткарылышы сыяктуу маселелер көтөрүлдү.

Жыйын соңунда айтылган көйгөйлөрдү чечүү боюнча тиешелүү тапшырмалар берилип, айрым кайрылуулар жеке көзөмөлгө алынды.