Димаш Кудайберген Олимпиада чемпиону Михаил Шайдаровго унаа белек кылды

Белгилүү казакстандык ырчы Димаш Кудайберген 2026-жылкы Олимпиада оюндарында тарыхый жеңишке жетишкен казакстандык фигурист Михаил Шайдаровго унаа белек кыларын билдирди.

Ырчы Instagram баракчасына казак тилиндеги видео кайрылуусун жарыялап, спортчуну эрдиги жана эмгеги үчүн куттуктады. Анда ал Шайдаровдун жеңиши бүтүндөй Казакстан эли үчүн чоң сыймык экенин белгилеген.

Маалым болгондой, Шайдаров эркектер арасындагы жалгыз муз тебүү боюнча алтын медаль утуп, өлкө тарыхында бул багытта Олимпиададагы алгачкы жеңишти камсыздады. Ал эркин программасын Димаш аткарган “Confessa” чыгармасына коюп, татаал элементтерди мыкты деңгээлде аткарган.

Өз кайрылуусунда Димаш спортчунун талантына жана эмгекчилдигине жогору баа берип, алдыдагы мелдештерде да ийгиликтерди каалады. Ошондой эле чемпионго унаа белек кыларын айтты.

Буга чейин Казакстандын Улуттук Олимпиада комитетинин президенти Геннадий Головкин да тарыхый медаль менен куттуктаган. Ал эми өлкө башчысы Касым-Жомарт Токаев спортчуну “Барыс” ордени менен сыйлай турганы маалымдалган.