Улуу Британия өспүрүмдөрдүн социалдык тармактарга кирүүсүн чектейт 

Улуу Британияда ушул жылы 16 жашка чейинки өспүрүмдөрдүн социалдык тармактарга кирүүсүнө чектөө киргизилиши мүмкүн экени айтылды. Бул тууралуу чет элдик басылмалар жазышты.

Маалыматка ылайык, чектөөлөр ушул жылдын жай айына чейин аткарылышы ыктымал. Тыюу салуу социалдык тармактарга гана эмес, ар кандай чат-ботторго жана жасалма интеллектке дагы тиешелүү болору айтылды.

Улуу Британиянын министрлер кабинети 16-февралдан тарта "Интернет коопсуздугу жөнүндө" мыйзамга өзгөртүү киргизүү боюнча мыйзам чыгаруу ишин баштаарын билдирген.

"Бүгүн биз балдардын келечегин тобокелге салган тешиктерди жаап, алардын келечеги үчүн пайдубал түптөп жатабыз. Балдардын жыргалчылыгын коргоп, ата-энелерге социалдык тармактарды көзөмөлдөөгө жардам берип жатабыз",- деген өкмөт башчы.