"Албетте, азыр ыракмат айтпайт". Өлкө башчысы Ташиев эч бир кызматка барбай турганын билдирди

Бүгүн, 16-февралда өлкө башчысы Садыр Жапаров УКМКнын мурдагы төрагасы Камчыбек Ташиевди эч бир кызматка барбай тургандыгын "Кабар" агенттигине берген маегинде баса белгиледи.

Президент достук позициясы өзгөрбөстүгүн айтып, аны айланасындагы “ак сакал, көк сакалдардан” арылсын деп билдирди.

"Мен табиятынан эле кандайдыр бир талаштуу маселелер жаралса, эч бир адам менен урушпай-талашпай эле сабырдуулук менен чечишип алганды жакшы көрөм. Дос бойдон кала беребиз. Бирок ал киши кандайдыр бир мамлекеттик кызматка келбейт. Дос эс алсын, ден соолугун карасын. Тегерегидеги “ак сакал, көк сакалдардан” арылсын, тазалансын. Тергөө кызматы баарын аныктап, тазалап берет. Албетте, азыр ыракмат айтпайт. Капа болот. Бирок жылдар өткөндөн кийин “досум сен ошондо туура кылыпсың” деп ыракматын айтат",- деди Жапаров.