Канатбек Абдыкадыровдун өлкөдөн чыгуусуна чектөө коюлганы айтылууда

Бүгүн Кыргыз футболдук союзунун вице-президенти Канатбек Абдыкадыров чет өлкөгө чыгууга аракет кылганда чек арадан өткөрүлгөн жок. Бул тууралуу күч түзүмдөрүндөгү өздүк булактарга шилтеме берүү менен 24.KG жазды.

Маалыматка ылайык, чек ара көзөмөлүнөн өтүп жаткан учурда анын аты-жөнүнө чыгууга чектөө коюлганы аныкталган. Андан соң Абдыкадыров Ички иштер министрлигинин башкы кылмыш иликтөө башкармалыгына суракка жеткирилген. Кийинчерээк ал коё берилген. Окуя боюнча укук коргоо органдары азырынча расмий комментарий бере элек.

Ошондой эле булактар Нургазы Анаркуловдун кармалганын билдиришти. Ал мурдагы УКМКнын төрагасы Камчыбек Ташиев менен жакын байланышта болгону айтылууда.

Маалыматка караганда, Анаркулов Казакстан менен чек арадан Кыргызстанга кирип келе жаткан учурда кармалган.

Бул маалыматтар азырынча расмий органдар тарабынан тастыктала элек.