Президенттин атынан тараган фейк видеолор тууралуу ИИМ эскертти (видео)

Интернетте президенттин атынан жасалма видеолор тарап жатат. Ички иштер министрлиги ушул сыяктуу видеолорго алданбоого чакырат.

"Заманбап технологиялардын жардамы менен алдамчылар белгилүү адамдардын, анын ичинде президенттин атынан жасалма видео кайрылууларды таратышы мүмкүн. Мындай видеоматериалдар жасалма интеллекттин (deepfake) жардамы менен даярдалат. Алардын негизги максаты - жарандарды адаштыруу, ишенимине кирүү жана акча каражаттарын которууга же жеке маалыматтарын берүүгө түртүү",- деп айтылат билдирүүдө.

Эсиңизде болсун:

• Белгисиз жана ишенимсиз булактардагы видеолорго ишенбеңиз;
• Маалыматты мамлекеттик органдардын расмий булактарынан гана текшериңиз;
• Шектүү шилтемелерге өтпөңүз;
• Интернеттеги видео кайрылууларга таянып акча которбоңуз жана жеке маалыматтарыңызды бербеңиз.