Чүйдө мыйзамсыз курал жүгүртүүгө шектелген эки жаран кармалды

Чүйдө мыйзамсыз курал жүгүртүүгө шектелген эки жаран кармалды. Бул тууралуу Чүй ОИИББинин басма сөз кызматы билдирди.

Маалыматка ылайык, өткөн жылдын октябрь айында райондук милиция "Калинин райондор аралык аңчылар жана балыкчылар" коомдук бирикмесинин өкүлдөрү менен биргеликте браконьерлик менен алектенген жарандарды кармашкан. Алардын жанынан тиешелүү уруксат берүүчү документтери жок "ТОЗ-16" жана "ТОЗ-8" үлгүсүндөгү ок атуучу куралдар табылган.

Бул факт мыйзамда белгиленген тартипте каттоого алынып, сотко чейинки текшерүү иштери башталган. Текшерүүнүн алкагында алынган куралдарга соттук-баллистикалык экспертиза дайындалган.

Факт боюнча Кылмыш жаза кодексинин 267-беренеси (Куралды, ок-дарыларды мыйзамсыз жүгүртүү) менен кылмыш иши козголуп, 16-февралда шектүү катары 38 жаштагы

М.М. жана К.Р. аттуу жарандар кармалды. Учурда тергөө иштери уланууда.