Садыр Жапаров Европа парламентинин депутаттарын кабыл алды

Бүгүн, 18-февралда президент Садыр Жапаров Борбордук Азия өлкөлөрү менен байланыш боюнча делегациянын төрайымы Джузеппина Принчи баштаган Европа парламентинин депутаттарын кабыл алды. Бул тууралуу өлкө башчысынын басма сөз кызматы билдирди.

Маалым болгондой, жолугушууга Италиядан шайланган Жузеппина Принчи, Кьяра Жемма, Германиянын депутаттары Свен Симон, Томаш Фрёлих, франциялык Тьерри Мариани, Юсси Сарамо, Чехиянын депутаты Антонин Станек, Болгариядан барган Кристиан Вигенин катышты.

Анда Кыргызстан менен Европа Биримдигинин ортосундагы кызматташтыкты андан ары өнүктүрүү маселелери, анын ичинде парламенттер аралык өз ара аракеттенүүнү чыңдоо, адам укуктарын коргоо жана сөз эркиндигин камсыз кылуу маселелери талкууланды.

Мамлекет башчысы Европа биримдиги жана Европа өлкөлөрү менен кызматташуу Кыргызстандын тышкы саясатынын артыкчылыктуу багыттарынын бири экенин белгилеп, мамилелерди мындан ары да чыңдоого даяр экенин ырастады. Садыр Жапаров Жогорку Кеңеш менен Европа парламентинин ортосундагы парламенттер аралык кызматташтык комитетинин кезектеги жыйынынын өткөрүлүшүн диалогдун негизги жана мазмундуу механизмдеринин бири катары жогору баалады.

Принчи өз кезегинде Садыр Жапаровго меймандостугу жана актуалдуу маселелерди талкуулоо мүмкүнчүлүгү үчүн ыраазычылык билдирди. Ал Европа биримдиги менен Кыргызстандын ортосундагы мамилелер ырааттуу өнүгүп жатканын айтты.

Жолугушуунун жыйынтыгында тараптар Кыргызстан менен Европа биримдигинин ортосундагы өз ара кызыкчылык туудурган артыкчылыктуу багыттар боюнча кызматташтыкты мындан ары да өнүктүрүүгө даяр экендиктерин билдиришти.