ТИМ башчысы Европа парламентинин өкүлдөрү менен кызматташтыкты талкуулады 

Кыргыз Республикасынын тышкы иштер министри Жээнбек Кулубаев Европа парламентинин делегациясы менен жолугушту. Бул тууралуу ТИМдин басма сөз кызматынан билдиришти.

Маалыматка ылайык, тараптар эки тараптуу кызматташтык, парламенттер аралык диалог жана аймактык күн тартиби боюнча маселелерди талкуулашты.

Министр өлкөдө жүргүзүлүп жаткан саясий жана экономикалык реформалар тууралуу маалымат берип, алардын туруктуу өнүгүүнү камсыз кылуудагы маанисин белгиледи. Ошондой эле ал ири инвестициялык долбоорлорду, анын ичинде «Камбар-Ата-1» ГЭСинин курулушун жана Кытай — Кыргызстан — Өзбекстан темир жол долбоорун тааныштырды.

Жолугушуунун алкагында Кулубаев Европа тараптын алдыңкы технологияларын тартууга кызыкдар экенин билдирип, транспорттук байланыштуулук жана энергетикалык коопсуздук бүткүл аймак үчүн стратегиялык мааниге ээ экенин белгиледи.

Жыйын ачык дискуссия форматында уланды. Анда министр европалык депутаттардын суроолоруна жооп берип, экинчи даражадагы санкциялар маселеси боюнча Кыргызстандын позициясын так белгиледи жана өлкө эл аралык милдеттенмелерин сактай турганын ырастады. Ошондой эле Борбор Азиядагы негизги чакырыктар жана демилгелер боюнча кеңири түшүндүрмө берилди.