Саламаттык сактоо министрлиги дарыгердин кармалышы боюнча билдирүү таратты

Саламаттык сактоо министрлиги Бишкектеги Эне жана баланы коргоо борборунун дарыгер-нефрологунун кармалышы боюнча билдирүү таратты.

Маалыматка ылайык, иликтөө мыйзам алкагында ыйгарым укуктуу укук коргоо органдары тарабынан жүргүзүлүп жатат.

Саламаттык сактоо министри Каныбек Досмамбетов компетенттүү мамлекеттик органдар менен байланышып, иштин жагдайларын бардык медициналык жана эксперттик корутундуларды эске алуу менен объективдүү, ар тараптуу жана калыс кароо зарылдыгын баса белгиледи.

"Саламаттык сактоо министрлиги мыйзам бузууларды жашырууга жол берилбейт, бирок медицина кызматкерлерин негизсиз куугунтуктоого да жол берилбеши керек. Ар бир иш боюнча акыркы чечим фактылардын, далилдердин жыйындысына жана көз карандысыз медициналык экспертизанын жыйынтыгына негизделиши зарыл",- деп жазылат маалыматта.

Белгилей кетсек, 18-февралда Бишкектеги Эне жана баланы коргоо борборунун нефролог дарыгери Н.Б. кармалган. Бишкек ШИИББи дарыгер аталган ооруканада мурда дарыланган бейтап баланын энесинин арызы боюнча кармалганын билдирген. Апасы милицияга 2024-жылы 13 жаштагы кызы аталган ооруканада туура эмес дарылоонун кесепетинен оң бутун кестирүүгө мажбур болгонун айтып кайрылган. Дарыгер убактылуу кармоочу жайга киргизилген.