Маданият министрлиги TikTok тиркемесин бөгөттөн чыгарууну сунуштады 

Маданият министрлиги TikTok социалдык тармагын бөгөттөн чыгарууну сунуштады. Бүгүн, 19-февралда министрликтин жыйынында маданият министринин орун басары Марат Тагаев аталган тиркемени бөгөттөө чечимин кайра карап чыгуу зарылдыгын билдирген.

Анын айтымында, өлкөдө аталган социалдык тармак бөгөттөлгөн, бирок ага карабастан VPN аркылуу колдонгондор бар.

"Кечээ депутаттар Кыргызстанда тыюу салынган айрым платформалар жана социалдык тармактар ​​тууралуу айтышты. Бүгүнкү күндө Кыргызстанда TikTok бөгөттөлгөнүнө карабастан, жаштарыбыз жана жалпы жарандарыбыз бул платформаны VPN аркылуу колдонуп жатышат. ТикТокту бөгөттөн чыгаруу боюнча биздин министрликтин сунушун карап чыгууну суранабыз",- деген ал.

Белгилей кетсек, кечээ, 18-февралдагы Жогорку Кеңештин жыйынында депутат Дастан Бекешев TikTok тиркемесин бөгөттөн чыгарууну сунуштаган.