Кыргызстандын аялдар саясаты эл аралык деңгээлде жогору бааланды

Бириккен Улуттар Уюмунун Гендердик теңчилик жана аялдардын укуктарын кеңейтүү түзүмү Аткаруу кеңешинин биринчи сессиясында Кыргыз Республикасынын Туруктуу өкүлчүлүгү Вице-президент катары гендердик теңчиликти илгерилетүүгө жана уюмдун мандатын натыйжалуу ишке ашырууга бекем берилгендигин билдирди. Бул багыттагы аракеттер, анын ичинде «БУУ-80» демилгесинин алкагында жүргүзүлүп жатканы белгиленди.

Бул тууралуу БУУдагы Туруктуу өкүлчүлүктөн билдиришти.

Маалыматка ылайык, жыйында Кыргыз Республикасы улуттук деңгээлде жетишилген маанилүү жыйынтыктарды сунуштады. Маалыматка ылайык, аялдар жергиликтүү кеңештердеги мандаттардын 42 пайызын, ал эми Жогорку Кеңештеги орундардын 33 пайызын ээлеп келет.

Ошондой эле өлкөдө үй-бүлөлүк зомбулуктун алдын алуу жана ага бөгөт коюу боюнча мыйзамдык база чыңдалганы, айрыкча айыл жергесиндеги аялдардын экономикалык мүмкүнчүлүктөрүн кеңейтүүгө багытталган мамлекеттик жана социалдык программалардын масштабы кеңейгени айтылды.

Кыргыз Республикасы мындан ары да «Аялдар, тынчтык жана коопсуздук» күн тартибин илгерилетүүгө, ошондой эле Борбор Азия аймагында гендердик маселелер боюнча кызматташтыкты тереңдетүүгө активдүү салым кошо турганын ырастады.

Мындан тышкары БУУнун Аялдардын абалы боюнча комиссиясынын 70-сессиясынын алдында Кыргызстан Пекин аракеттер платформасын ишке ашырууну тездетүүгө жана аялдар менен кыздардын укуктарын кеңейтүүдө өлчөнө турган, натыйжалуу жыйынтыктарга жетишүүгө болгон милдеттенмесин дагы бир жолу белгиледи.