Улуу Британиянын падышасы иниси Эндрюнун кармалышы тууралуу биринчи жолу үн катты 

Улуу Британиянын падышасы Карл III иниси, мурдагы ханзаада Эндрю Маунтбеттен-Виндзордун кармалышы боюнча алгачкы жолу үн катты. Бул тууралуу чет элдик басылмалар жазышты.

Анда монарх толук иликтөөнүн зарылдыгын белгилеп, хан сарай тергөөгө тоскоол болбой турганын билдирген.

"Мен Эндрю Маунтбеттен-Виндзорду кызмат абалынан кыянаттык менен пайдаланганы тууралуу укканда аябай өкүндүм. Бул маселе боюнча тийиштүү органдар тарабынан толук, адилет иликтөө жүрүп жатат. Таза иликтөө жүрөрүнө ишене алышат",- деген Карл III.

Мурдагы ханзааданы 19-февралда полиция кармап кеткен. Ал америкалык чуулгандуу финансист Жеффри Эпштейн менен болгон байланышы боюнча тергөөнүн алкагында кызмат абалынан кыянаттык менен пайдаланган деп шектелүүдө. Бирок 12 сааттык сурактан кийин полиция бөлүмү аны бошоткон.