Жанар Акаевдин шаар мэри катары алгачкы рейди борбордук базарда башталды (видео)

Ош шаарындагы борбордук базардын ордун Ташкенттеги "Magic City" сыяктуу заманбап эс алуучу жана маданий борборго айландыруу керек. Бул тууралуу бүгүн, 20-февралда Ош шаарынын мэри Жанар Акаев рейд учурунда билдирди.

Мэриянын маалымат кызматы билдиргендей, жаңы мэр алгачкы рейдин Ак-Буура дарыясынын жээгинде жайгашкан эски Ош базарынын аймагын жеринде көрүп чыгуу менен баштады. Анда сунушталып жаткан долбоорлор менен таанышты.

Акаев аталган аймакты иретке келтирип, шаар тургундары жана коноктору үчүн ыңгайлуу, коопсуз жана заманбап эс алуу жайына айландыруу зарылдыгын белгиледи. Ошондой эле жөө жүрүүчүлөр үчүн шарттарды түзүү, жашыл аймактарды көбөйтүү, кызмат көрсөтүү объекттерин заман талабына ылайык жайгаштыруу маселелерине өзгөчө көңүл бурулушу керектигин айтты. Ошондой эле тиешелүү мекеме-ишканаларга аталган аймак боюнча кыска мөөнөттүн ичинде комплекстүү жаңы долбоор иштеп чыгып, аны ишке ашырууда жеке ишкерлер менен тыгыз кызматташуу зарылдыгын белгиледи.

Мындан тышкары, мэр долбоорго инвестиция салууга ишкерлерди чакырып, мэрия тарабынан тиешелүү колдоо жана шарттар көрсөтүлөрүн баса белгиледи.

Эскерте кетсек, аталган базар өткөн жылы шаардын сыртындагы жаңы комплексге көчүрүлгөн.