Саламаттык сактоо министринин орун басары эки бейтаптын жүрөгүнө оор операция жасады

Жүрөк хирургиясы жана органдарды трансплантациялоо илимий-изилдөө институтунда абалы оор деп бааланган бейтаптарга митралдык клапанды алмаштыруу боюнча татаал операциялар жасалды. Аны саламаттык сактоо министринин орун басары Бакыт Кадыралиев колго алганын мекеменин маалымат кызматы билдирди.

Маалым болгондой, операция ийгиликтүү өттү. Бейтаптардын бири канааттандырарлык абалда үйүнө чыгарылса, экинчиси стационарда дарылануусун улантып, этап-этабы менен реабилитациядан өтүүдө.

"Бул операциялар институттун жаш кардиохирургдары үчүн практикалык мастер-класс болду. Иштин жүрүшүндө адистер татаал учурларда дарылоо тактикасын байкоого, кардиохирургиялык дарылоонун заманбап ыкмаларын жана өтө татаал операцияларда чечим кабыл алуунун өзгөчөлүктөрүн талкуулоого мүмкүнчүлүк алышты. Улуттук кардиохирургиянын өнүгүшү, тажрыйбанын жаш дарыгерлерге өткөрүлүп берилиши жана заманбап технологиялардын киргизилиши алдыңкы клиникалардын деңгээлинде жардам көрсөтүүгө шарт түзөт. Бул жарандарга чет өлкөгө чыкпастан, өз мекенинде дарылануу мүмкүнчүлүгүн берет",- деп белгиленген маалыматта.