Эмгек министри Индиянын элчиси менен эки тараптуу кызматташтыкты талкуулады

Бүгүн, 20-февралда Эмгек, социалдык камсыздоо жана миграция министрлигинде министр Канат Сагынбаевдин Индиянын элчиси Бирендер Сингх Ядав менен жолугушуусу болуп өттү. Бул тууралуу мекеменин басма сөз кызматы билдирди.

Маалыматка ылайык, тараптар эмгек, иш менен камсыз кылуу жана эл аралык эмгек мобилдүүлүгү жаатындагы эки тараптуу кызматташуунун учурдагы абалы жана келечеги тууралуу пикир алышып, Индиядан келген эмгек мигранттарынын укуктарын жана мыйзамдуу кызыкчылыктарын коргоо маселелерине өзгөчө көңүл бурушту.

Министр Индия менен конструктивдүү диалогду өнүктүрүү социалдык-эмгек тармагындагы мамлекеттер аралык өз ара аракеттенүүнү чыңдоодо, ошондой эле чет өлкөлүк кызматкерлер үчүн татыктуу эмгек шарттарын жана социалдык коргоону камсыз кылуунун механизмдерин калыптандырууда маанилүү экенин белгиледи.

Жолугушуунун жыйынтыгында тараптар аталган багыттар боюнча эки тараптуу кызматташуунун алкагында активдүү диалогду улантууга жана өнөктөштүк мамилелерди өнүктүрүүгө ниеттерин ырасташты.