Өзбекстан биринчи космонавтын космоско учурууга даярданууда

Өзбекстанда космоско уча турган космонавтты тандоо боюнча жалпы улуттук сынак башталды. Бул тууралуу Өзбекстандын президенти Шавкат Мирзиёевдин катышуусунда өткөн презентация учурунда белгилүү болгонун жергиликтүү басылмалар жазышты.

Маалым болгондой, Мирзиёевдин тапшырмасына ылайык, талапкерди издөө жана даярдоо менен алектене турган атайын мамлекеттик комиссия түзүлгөн. Анда болочок космонавттын ден соолугуна, илимий билимине жана чет тилдерин билүү деңгээлине карата катуу талаптар коюлат.

Мындан тышкары, "Мирзо Улугбек" аттуу биринчи улуттук илимий спутникти түзүү боюнча иштер жүрүп жатат. Аны учуруу 2028-жылга пландалып, иштеп чыгууга Японияда билим алып жаткан өзбекстандык студенттер да катышып жатканы айтылды.