Жогорку Кеңештин төрагасы Орусиянын элчисин кабыл алды

Төрага Марлен Маматалиев Орусиянын Кыргызстандагы элчиси Сергей Вакуновду кабыл алды. Бул тууралуу 23-февралда Жогорку Кеңештин басма сөз кызматы билдирди.

Маалыматка ылайык, тараптар эки өлкө ортосундагы калыптанган кызматташтыкты жигердүү улантуу тууралуу маселелер боюнча ой бөлүштү. “Эки мамлекет ортосундагы саясий диалог жана стратегиялык өнөктөштүк жогорку деңгээлде экенин баарыбызга белгилүү. Биз достукка жана өз ара ишенимге негизделген байланыштарды мындан ары да улантып, парламенттер аралык алакаларды да жигердүү өнүктүрүшүбүз кажет”,- деп билдирди төрага. Муну менен катар жакынкы аралыкта Орусияга расмий сапар менен барарын айтты.

Буга кошумча айрым актуалдуу маселелерге токтолуп кыргызстандык эмгек мигранттарына жана алардын үй бүлөлөрүнө түзүлгөн шарт жагдайды жакшыртуу жаатындагы айрым сунуштары менен бөлүштү. Ошондой эле Кыргызстанда орусиялык номур менен жүргөн унааларды мыйзамдаштыруу жаатында да биргелешип иш алып баруу зарыл экенин айтты. “Чечилбеген маселе болбойт. Өнөктөш өлкөлөр катары ар бир маселени ачык талкуулап, сүйлөшүүлөрдү жүргүзүү менен бардык маселени чечишибиз керек”,- деп кошумчалады.

Ал эми Орусиянын элчиси Марлен Маматалиевди Жогорку Кеңештин төрагасы болуп шайланышы менен куттуктап, жоопкерчиликтүү ишине ийгиликтерди каалады. Андан тышкары, элчи катары төраганын алдыдагы расмий сапарын уюштурууга болгон күч-аракетин жумшап, көмөк көрсөтөрүн убада кылып, айтылган ар бир сунуш маанилүү экенин белгиледи.