Ош мэриясы 100 күндүк иш-планды коомчулукка сунуштайт

Ош шаарында 100 күндүк жана 1 жылдык стратегиялык план жарыяланат. Бул тууралуу шаардык мэриядан билдиришти.

Маалыматка ылайык, Ош шаарынын мэри Жанарбек Акаев аппараттык жыйын өткөрүп, алдыдагы артыкчылыктуу милдеттерди тактады. Шаар башчысы президент тарабынан коюлган тапшырмаларды ыкчам аткаруу жана шаарды өнүктүрүүдө ар бир саат, ар бир мүнөт маанилүү экенин белгилеген.

Анын айтымында, жакынкы күндөрү шаарды өнүктүрүүнүн 100 күндүк жана 1 жылдык стратегиялык планы иштелип чыгып, коомчулукка жарыяланат. Документте социалдык тармак, экономика жана курулуш багытындагы ири долбоорлор камтылары айтылды.

Мэр пландарды ишке ашырууда бирдиктүү жана жигердүү иш алып баруу зарыл экенин баса белгилеп, кызматкерлерди темпти түшүрбөөгө, адамгерчиликтин, мыйзамдын жана мамлекеттик этиканын алкагында жоопкерчиликтүү иштөөгө чакырды.