Жээнбек Кулубаев Антониу Гутерриш менен жолугушту

Бүгүн, 23-февралда, куралсыздандыруу боюнча жогорку деңгээлдеги конференциянын сегментине катышуу алкагында, тышкы иштер министр Жээнбек Кулубаев БУУнун генералдык катчысы Антониу Гутерриш менен жолугушуу өткөрдү. Бул тууралуу ТИМдин басма сөз кызматынан билдиришти.

Маалыматка ылайык, жолугушуунун жүрүшүндө тараптар кызматташтыктын учурдагы абалы жана келечеги боюнча пикир алмашышты.

Жолугушууда БУУнун тынчтыкты чыңдоодо жана глобалдык чакырыктарга жооп берүүдө негизги ролун колдоо тастыкталды. Ошондой эле тараптар конструктивдүү кызматташууга даяр экенин билдиришти.

Маалыматта «ООН-80» демилгесине өзгөчө көңүл бурулганы айтылган — ал уюмдун эффективдүүлүгүн жогорулатууга жана модернизациялоо иштерине багытталган. Реформаларды колдоо жана алардын жүзөгө ашырылышында кызматташууга даярдык белгиленди. Кыргыз тараптын БУУнун агенттиктери менен өлкө ичинде активдүү кызматташтыгы да баса белгиленди.

Мындан тышкары, министр 2026-жылы Шанхай кызматташтык уюмунун саммитин жана VI Дүйнөлүк көчмөндөр оюндарынын өтөөрүн, ошондой эле 2027-жылы «Бишкек+25» саммитин өткөрүү пландалып жатканын маалымдады. Бул багытта Кулубаев Гутерришти аталган иш-чараларга катышууга чакырды.