Төрага Маматалиев Орусияга иш сапары менен барат 

Жогорку Кеңештин төрагасы Марлен Маматалиев Орусияга расмий иш сапары менен барат. Бул тууралуу 23-февралда төрага Орусиянын Кыргызстандагы элчиси Сергей Вакунов менен жолугушканда белгилүү болду.

Жолугушууда эки өлкө ортосундагы калыптанган кызматташтыкты жигердүү улантуу тууралуу сөз болуп, тараптар аталган багыттагы айрым маселелер боюнча ой бөлүштү.

Жолугушууда төрага жакынкы аралыкта Орусияга расмий сапар менен барарын белгилеген.

“Бул сапар парламенттер аралык диалогду эле эмес, мамлекеттер аралык кызматташтыкты тереңдетүү үчүн өзгөчө мааниге ээ. Андыктан, жолугушууларда эки тараптуу байланыштарга тиешелүү жагдайлар талкууланып, расмий сапар жемиштүү болот деген ишеничтемин”,- дейт төрага.