Депутат никеге турууну көздөгөн жарандарды медициналык кароодон өткөрүүнү сунуштады

Жогорку Кеңештин депутаты Нуржамал Төрөбекова никеге турууну көздөгөн жарандарды милдеттүү медициналык кароодон өткөрүүнү сунуштады. Бул тууралуу эл өкүлү 24-февралда парламенттин Эмгек, саламаттык сактоо, аялдар иштери жана социалдык маселелер комитетинин жыйынында айтты.

Отурумда гепатит ооруларынын алдын алуу жана республикадагы гепатит боюнча жалпы эпидемиологиялык абал тууралуу сөз болуп жаткан.

Айтымында, мындай чара ар кандай жугуштуу оорулардын алдын алуу болуп саналат.

"Никеге турууну көздөгөн жарандарды милдеттүү медициналык текшерүүдөн өткөрүүнү сунуштайт элем. Мисалы, Өзбекстанда канча жылдан бери үйлөнө турган жаш жубайлар биринчи ВИЧке, боор ооруларына карата анализ тапшырып, андан соң баш кошушат. Мындай практика башка чет өлкөлөрдө да бар. Бул жубайлардын бири-бирине инфекцияны жугузуусун алдын алуу болуп саналат",- деди депутат.