Бишкекте 5 жыл мурунку алдамчылык ишине шектелген жаран кармалды

Бишкекте 36 жаштагы жаран алдамчылыкка шектелип кармалды. Бул тууралуу борбор калаанын милициясы билдирди.

Маалыматка ылайык, шектүү 2021-жылдын 15-январында жабырлануучунун Токтоналиев көчөсүндө жайгашкан батирин үчүнчү жактарга сатып жиберген. Натыйжада батир ээси 3 миллион сомдон ашуун чыгымга учураган.

Факт боюнча Кылмыш-жаза кодексинин 209-беренеси (Алдамчылык) менен кылмыш иши козголуп, шектүү убактылуу кармоочу жайга киргизилген.

Учурда тергөө иштери уланууда.